TASKKIWT

Tallast : Aziz Nissin, asughl : Rachid Najib Sifaw   

Aziz Nissin, amarra aturki / Aziz Nesin, écrivain turc / Aziz Nesin, a Turkish writer

Zdârgh ad awn inigh masd tawingmt ad ur tgi tinw, d ur ad nzêr kullu imrdukkutn ad mtad is ur igi tamghart inu lli yyi bdda izziwzn kraygat ass, ar yyi ttini :

– Nirmin tadjart ngh, dars taskkiwt, ula Birzad tiwid yat tskkiwt ad as ttaws gh twwuriwin…amma nkkin lli yiwi gar argaz, ittyara flla ad skargh tiwwuriwin n taddart bla taskkiwt !

Zdârgh ad awn dagh inigh, masd is flla ur icqi ad skargh tiwwuriwin n taddart, afad a sul ur tswingim tmghart inu gh twingmt n tskkiwt, ar as ttinigh :

– Wa tamghart inu iàzzan, illa fllam ad tssnt masd argaz n Nirmin iga amstag mqurn, amma argaz n Bbirzad hati iga  yan gh willi tâfnin iqarîdn ggutnin…

Ad asd ukan inigh ghikad sigh a flla tsghuyyu :

– Mad igan arkkad inu ? zayd ttlli s twwuri maghad ttbbit iqarîdn ula kyyin !

Zrin ussan ackind wiyyâd, tamghart inu ar yyi ukan tzziwiz ad as d awigh taskkiwt, aylligh akk ttinin tarwa ngh imnidn nsn gh ufds ad. Yan wass tnna yyi illi:

– Ttây iswingimn nna a baba , ixassâ ad darngh tili tskkiwt!

Gh uddud ad, ur dari illi abla ad skrgh s uzûzd n tmghart inu, uttrgh gis ad ttlli s tskkiwt. Ur awn tid nnigh, kullu ussan ann, lligh a srs ttlli, ur jjund nkkni ad iccan tirmt ifulkin, mac nsunfa gh taqurt n tmghart !

Yan wass, kcmghd s taddart, afighd tawacult gh yat tizi n tumrt bahra yattuyn, sqsagh:

– Madd igguran gh taddart ?

– Fiss, hati nufa taskkiwt !

– Is iga tidt ayad mu sllagh ? manzatt ? mamnk ad tga ?

Imikk n tizi sighd tugga tmghart inu, tamêz yyi afus tmun didi s dar tskkiwt, tini:

– Had taskkiwt ngh, assagh ns Aytin Hanim.

Udm ns akad immnkr, tga yat tmghart ixcenn, mac tlsa kra n ihidûrn fulkinin bahra.

Nskkus, tskkus tskkiwt gh tama nw, tsrs adâr f udâr, tini:

– Ttughnn girrû nw, ur darun illi mad kmmigh ?

– Tnkr tmghart inu tawi yasd yan ugirrû, tssrgh ast !

Tnna tskkiwt:

– Mnckk n idrimn ar ad yyi takkam gh wayyur ?

Gh tizi yad, annighenn ayt taddart ar d gigi smuquln zund igh a yyi ttinin ad inigh yan wanck iggutn igan manik. Saw is rad tiri timidî n idrimn gh wayyur ? mac anck ad iggut bahra ! waxxa zzenzigh mrawt tallasin ur ad izdîrgh at smungh. Lligh tzêra tskkiwt masd is sigutgh gh iswingimn, tnna:

– Tar awan ! ini anck lli mu tzdârt !

Nnigh as s imikk n tkssâd:

– Saw igh am nfa timidî n idrimn gh wayyur ?

Gh tizi yan nit, tldi yat tghuyyit, tini:

– Anck nna ur yyi iqadda awd ad sgh tidukin !

Lligh slligh i tguri yad, hêdîgh idârn inu gh ddu tattblêt acku ur lsigh abla idukan bbinin !

Nnigh as:

– Gh tidt, waxxa rad am nakka idrimn drusnin, mac hati rad darngh timyurt tumrt.

Tnna yyi:

– Manik ? wand anaw nk ar ad yyi issimyur ? ur annigh awd yan izbl gh ugayyu nk !

Ullgh awal inw, ghrgh i Jinkiz, iwi, ikcmd, tanni ukan tskkiwt afulki ns, tini:

– Waxxa, rad darun swwurigh s snat timmâd n idrimn i wayyur, mac righ ad ttamzêgh anck ad s ddulâr !

Annighn tamghart inu tsmmatr yyi ad as inigh waxxa, inigh ast.

Ar nsawal f tiwwuriwin n taddart, tsmaql gigi tskkiwt, tini yyi:

– Mad igan tawwuri nk ay argaz ?

Rargh as:

– Gigh amara n tallasin.

Tini dagh:

– Is izdâr ufgan add ittbbi idrimn gh tirra n tallasin ?

– Asurs ngh ayad, marad za nskr ?

Tsqsa dagh:

– Mad igan anaw n lfrijidir nnun.

– Urt nttâf gh uzmz ad, mac ratt nsgh gh mann ur yaggugn.

– Hiyya awd acrmad n tassfifin ur darun lli !

– Uhuy, mac illa darngh usdrer gh wanaw ifulkin.

Tizi yan, tnna tskkiwt:

– Ssfldat yyi, yuf awn ad tettâym tawngimt n tskkiwt gh igyya nnun, yuf awn ad ttlim knni s twwuri acku tudrt nnun ur bahra tfulki !

Tddu tskkiwt, tsmaql gh Jinkiz tini yas:

– Tgit aàzri ifulkin, mac waxxa ghid illa Brandu, ur rad skkusgh gh tgmmi yad gh illa lâz.

Tsmaql gh illi, tini yas:

– Amma kmmin a tafruxt, swingm bahra gh ugayyu nm !

Lligh tra ad tffugh, tsawl s tmghart inu :

– Zayd a tamghart tlli s twwuri maghad ttbbit imikk nm, urd ad ttellit s tskkiwt !

Trzêm tskkiwt taggurt, tffugh, tutnn srs.

Wiss sin ussan, kullu tawacult: tamghart inu, illi ula Jinkiz, ftan ar ttllin s twwuri. Tamghart tswwuri dar yat mmu tadûtt, illi dar tamstagt, ula Jinkiz ghd nttan ifl tighri, iswwuri gh yan urti.

Amawal

Taskkiwt : la bonne
Imrdukkutn : les événements
Afds : le sujet
Tawingmt : l’idée
Amstag : le commerçant
Imnidn : les opinions
Asdrer : la radio
Tawacult : la famille